Sa Sulu, nadakpan sa Abu Sayaf ang tulo ka sundalo. Atong sugdan na ang pag-latigo sa ila, nakadawat ug tawag ang pinaka-hepe sa mga bandido. Pagkahuman ug istorya sa "satellite phone", gisultihan niya ang mga bihag nga sundalo.
"Swerte pa mo kay birthday karon sa among supremo. Tagaan kuno mo ug higayon nga makahangyo, usa kamo latiguhon aning ikog sa page nga akong gikuptan karon. Sige, paila-ila mo, unya sulti sa inyong hangyo! Ayaw itago ang inyong pagka-Kristiyano. Ipakita ang inyong pagtuo sa inyong Diyos kay tagaan mo nako'g dugang nga konsiderasyon."
Una nga sundalo: "Taga Sugbo ko kung diin gibunyagan ang unang mga Kristiyano sa Pilipinas. Taga didto sa amo ang unang nakapatay ug banyaga. Mao nga Sugboanon ang pinaka-una ug pinakatinu-od nga Pilipino. Ang akong hangyo nga butangan ug unlan ang akong likod arun pud dili sakit kaayo ang igo sa imong latigo. Unya, ang sunod nako nga hangyo..."
Abu Sayaf: "Uppsss! Tagsa ra ka hangyo ang inyong mapangayo. Sige, ihikot ang unlan sa iyang likod. Tagaig singkwenta ka bunal!"
Gilatigo sa ikog-page ang Sugbo-anon. Wala pa moabot sa baynte ka bunal nabungkag na ang unlan. Sa ika-kwarentay cinco ka bunal, gikuyapan sa kasakit ang sundalong taga-Sugbo.
Ikaduha nga sundalo: "Taga Limasawa ako. Didto sa among isla gisaulog ang pinaka-unang misa sa Pilipinas. Kada tuig sa among piyesta daku kaayo ang selebrasyon sa anibersaryo aning unang misa niadtong 1521. Ang akong hangyo nga himuong traynta na lang ka bunal sa ikog-page ang dawaton sa akong likod nga butangan ug duha ka unlan."
Abu Sayaf: "Sige na tugotan na ang imong duha ka hangyo kay taga Limasawa man ka nga nagpakitag garbo sa imong lugar. Traynta na lang ka bunal. Ibugkot ang duha ka unlan sa likod aning taga Limasawa."
Sa ika-baynte otso pa lang nga bunal, napulpog na ang duha ka unlan. Pag-abot sa ika-traynta ka bunal, nagminatay nag hilak ang sundalong taga-Limasawa.
Ikatulo nga sundalong bihag: "Taga Butuan ako nga gikan gayud sa lugar nga gitawag Masawa. Dili na ko makiglantugi pa nga didto sa amo ang primera misa en las islas Filipinas. Imbes nga traynta lang ka bunal nga gihatag kang Limasawa Boy, imbes nga singkwenta ka bunal nga gidawat sa taga-Sugbo, sige hatagi ko ninyo ug duha ka gatos na bunal. Ang hangyo lang nako nga ayuha kaayo paghigot sa akong likod anang taga-Limasawa!"
